بداية احب اقولكم اني باستخدم كرسي متحرك من 19 سنة، ومن خلال شغلي زرت أماكن كتيرة تدعي انها تدعم الأشخاص ذوي الإعاقة سواء كأماكن توظيف أو تدريب أو شركات أو مؤسسات مجتمع مدني وللأسف اغلب الاماكن كانت غير مهيئة وكان صعب الدخول لها. في الشهور الأخيرة صادفني زيارات كتير من النوع ده وكل مرة بازور مكان بالشكل ده بافتكر رحلتي لأسبانيا في 2017، لما المؤسسة الثقافية الأوربية جهزت مكان التدريب في مدريد باسانسير خاص علشان اوصل للجزء العلوي بالمكان، علشان هاقعد في حلقة نقاشية بمجموعة نص ساعة فقط، ورغم ان المكان كله مجهز ومتاح بالكامل ليا، وكنت باتحرك فيه بحرية، وكنت فاكرة لما دور مجموعتى هايجي في الجزء العلوي ده، هالاقي المكان اتغير للمجموعة باننا نقعد في الجزء الأسفل وده عادي، اتفاجئت في اليوم الثالث في موعد المجموعة بالمصعد ده اللي شايفينه في الصورة قدامكم ومعاه موظف مخصوص يشغله، باقول تاني ان ده اتعمل علشان نص ساعة مش أكثر، ومن الموقف ده نعرف الناس دي وصلت لفين في احترام الاختلاف واحترام كرامة الإنسان.
فكر شوية بغيرك
كل يوم بازور أماكن وفي الغالب واجهت صعوبة الوصول إليها وللأسف الناس بتتعامل مع الموضوع انه حالة فردية مع ان في اكتر من 2 مليون شخص في مصر يستخدم كرسي متحرك او عكازين، بالاضافة الى كبار السن، وكل الناس تقريبا بيتعرضوا في حياتهم في وقت ما لظرف خاص لفترة محدودة زي النساء الحوامل، او شخص رجله اتكسرت وبيتحرك ويمارس حياته لفترة بالجبس والعكاكيز، رجوع من مستشفى بعد اجراء جراحة....الخ كل ده مش في حساب او تفكير حد مع الأسف، ومحدش بيفكر في حقنا في الوصول بشكل آمن ومستقل لأي مكان، ولا حتى حد بيفكر انه في لحظة ممكن يكون من ضمن الشرائح دي ومحتاج يوصل مكان ومش هايقدر.
تغيير الأماكن مش تغيير البشر
للأسف كمان في فرص كتير بتضيع مننا كمستخدمي الكراسي المتحركة لان الاماكن مش مجهزة، تخيلوا لما تجي فرصة وظيفة أو تدريب مهم لشخص بيستخدم كرسي متحرك وبدل ما يظبطوا المكان علشان يوصل له، يعتذروا له ويشوفوا غيره. للاسف تغيير البني آدمين عندهم اسهل من تغيير المكان.
التطوير وتغيير الثقافة بيبدأ من كل واحد في المجتمع، مش بس المسئولين في الاماكن الحكومية لان ده جزء مش كل... مستخدم الكرسي المتحرك بيتحرك وبيحتاج يوصل لكل الأماكن (سجل مدني، مستشفى، عيادة، مكتب محامي، معمل تحليل، كنيسة، جامع، مطعم، كافييه، نادي، عمارة للسكن، مؤسسة، شركة، مكان تدريب،.......الخ) واظن متفقين ان ده حقنا كلنا، علشان كده فكر في مكانك دلوقتي، ايوه مكانك في الشغل- الجامعة- البيت- الشركة....الخ كل مكان بتروح فيه حتى القهوة اللي بتقابل فيها اصحابك واتأمل المكان كويس وشوف لو وصل شخص بيستخدم عكاز او كرسي متحرك او كفيف بعصايته البيضاء هايقدر يدخل المكان ويتجول بحرية ويتلقى خدمة زيك او لا ؟ وساعتها هاتعرف تلقائي دورك ايه وتقرر تكون جزء من التغيير اللي محتاجينه ولا ....!!!
Comments