نموتُ نموتُ وتحيا مصر
رشا المصري
صحيح في ناس ماتت في التحرير، وصحيح بسبب التظاهر في ناس مش لاقيه العيش، وصح
يح ان في ناس خسرت كتير، وناس زهقت من القعدة والفرجة من بعيد. وصحيح ان الحال واقف والبلد والعة والدنيا كلها بتتفرج علينا ومش عاوزة غير تفرح فينا. صحيح ان كل حاجة بقيت قدامنا مغلوطة ومش عارفين مين صح ومين غلط؟ ايه الافضل... يمشي ولا يقعد؟
لكن هاقولكم.... هي حريتنا وكرامتنا وسلامة بلدنا ماتستهلش ان كل واحد يضحي بحاجة في حياته علشانها؟
لكل الناس اللي بكلمها وبحكي عنها، في التحرير بينادوا بحريتنا.... واحنا... عملنا ايه؟ مش كتير تقدم وقتك او جزء من عملك، مش كتير تجوع شوية ما انت عايش جوع من سنيين؟ مش كتير تقلق شوية مش احسن من الخوف اللي عشش فينا وبقه جزء من حياتنا اللي غيرنا بيحاول يردهالنا بكرامة؟ مش كتير تقعد في البيت كام يوم وتجرب يعنى ايه شباب عاطلين؟
مش كتير تسهر تحمي ولادك ولا بيتك ولا بلدك ما هو غيرك ثلاثين سنة مايعرفش يعنى ايه بيت ولا ولد وعايش في الحرمان سنيين. مش كتير نفضل كده كمان شوية لغاية ما البلد ما تنضف من كل الظالمين والفاسدين اللي كانوا فاكرين انهم اكبر من كل حر في البلد دي بيصرخ ويقول حرام
اللي بيحصل فينا حرام
بنموت محروقين وغرقانيين ويقولوا مساكين
نموت هربانيين في بلاد غريبة وعلى حدودنا مفيش غير غوروا وخفوا البلد اتملت عاطليين
بنشرب مجاري ونطفح سموم ويقولوا اصله تقصير وفكرونا نحاكم المسئولين.
اهانة وذل وطفح بالدم والاسم مصريين
ابناء حضارة 7 الآف سنة عايشيين انصاف بنى آدمين
لو مش عاوز تقول كفاية للظلم،،،،، لو مش قادر ترفع صوتك وتقول لا
لو مش قادر تفتح عينيك على الحقيقة والمرّ
لو مش عاوز تصدق ان في بلدك ناس خانت وباعت وقبضت من دمك
يبقى انزل واضرب كل اللي تلاقيه في وشك في ميدان التحرير
بس افتكر ساعتها انك انت اللي رفضت تكون حرّ
لكن ارجوك لو مش قادر او مش عارف او متلخبط سيبنى اقولها وانشالله اموت
انا عاوز اكون حرّ
عاوز اعيش في بلدي انسان
نموت نموت وتحيا مصر
"كلماتي نابعة من ايماني بالحرية والحق واحساسي بشباب ثورة 25 يناير في ميدان التحرير اللي كنت نفسي اكون معاهم لكن للأسف كنت ضمن الناس اللي مقدرتش"
Comments