رسالتي للجميع.. رشا المصري

الرسالة دي لكل واحد فينا

اولاً: الناس اللي من اول الثورة كانت بتقول دول حبة عيال، وهايخربوا البلد، وبعدها قالوا عليهم رجالة وعملوا اللي محدش قدر يعمله،، دلوقتي طلع لهم صوت وبيطالبوا بحقوقهم.... بنقولهم اوعوا تفتكروا انكم هاتعيشوا بمبدا مات الملك عاش الملك، ولا لو خرب بيت ابوك خد منه قالب. لاااااااااااا فوقوا البلد دي فيها شباب عاوزة تطهير وتغيير حقيقي مش سوق واتفتح لكل من هب ودب. واللي سكت على حقه 50 سنة واكتر يسكت شوية كمان لغاية البلد دي ماتشد حيلها. زمن الصعود على اكتاف اللي بيموتوا في اظهار الحق، ودم الشهداء اللي بيضيع خلاص انتهى. كل واحد فاسد هايتحاسب في البلد دي. الحكاية مسألة وقت مش اكتر.

ثانياً: الناس اللي بتتكلم عن الشباب ناكرين الجميل، يسمعوا كويس... ناكر الجميل هو اللي يحول نظره عن اللي رباه وعلمه وكبره وفهمه يعنى ايه حب وسلام وارادة وتغيير مصير. ناكر الجميل اللي بكل قلة اصل يقول معرفش ده وهو اللي رباه وعرفه يعنى ايه ضمير. ناكر الجميل هو اللي تعمل معاه كل حاجة وعلى حاجة صغيرة يقولك مش قابلين منك اي شيء من جديد. ناكر الجميل هو اللي مهما تعمل معاه ينسالك الجميل، ناكر الجميل يقولك بحبك طول ما بياكل من خيرك ولما تغفل عنه شوية يعض ايدك ويقلب كل حاجة عليك.... لكن مع مبارك محدش كان ناكر جميل، لانه معلمش حد ولا ربى حد ولا كبر حد غير الفاسدين اللي ضيعوه وضيعوا البلد سنيين. ورغم كل ده في نسبة كبيرة م الشباب احترموه لآخر لحظة، فارجوكم كفاية بقه طريقة التعميم دي.

ثالثاً: البلد دلوقتي محتاجلنا كلنا. سيبوا الحساب للمسئولين عنه واظن كلنا بنثق في النائب العام والقوات المسلحة. وكل واحد حاسس بفساد من حد معين او جهة معينة يقدم بلاغ رسمي. ايوه بلاغ رسمي، وانسوا بقه شعار البقاء للأقوى، وعيشوا شعار البقاء للأصلح.

من فضلكم عاوزيين كلنا نبدأ من جديد عهد جديد بشكل جديد، كله سلام وامان وعمل وجهد على مستقبلنا ومستقبل البلد. عاوزيين كلنا نبص قدام، ويبدأ كل واحد من نفسه، في شارعه، في شغله، في مدرسته او جامعته، في كل مكان عام او خاص. كنا مثال للحضارة في ثورة 25 يناير خلونا كمان نكون مثال ونكون متحضريين في اننا نرفع البلد دي من جديد في كل شيئ

من فضلك ابدأ بنفسك أولاً